Batagak Panghulu Datuak Bagindo Kali

BAGIKAN:

facebook twitter pinterest line whatapps telegram

Oleh admin
Selasa, 03 Juli 2007 00:00:00 Klik: 185
Bismillaahirrahmanirrahiim
Assalamualaikum Warahmatullahi Wabarakatuh
Kami sampaikan surek undangan nangko ka ganti siriah dalam carano, panuka rokok nan sabatang, pado batinnyo ka pangganti diri kami, untuak mampasambahkan salam tazim sarato doa samoga kito kasadonyo dalam sehat wal afiat.
Surek undangan ko, kami layangkan kapado: Niniak Mamak Penghulu nan XXIV nan Gadang Basa Batuah, Kadi, Imam, Khatib dan Alim Ulama suluah bendang nagari, sagalo Cadiak Pandai, Hulubalang, Manti pagawai adat, Bundo Kanduang limpapeh rumah gadang, basarato sagalo urang banyak, laki-laki, padusi jo anak-anak saisi nagari.
Disusun jari nan sapuluah, diunjam lutuik nan duo,
ditunduakkan kapalo nan satu,
salam sato sambah kami sampaikan kasadonyo
Adopun mukasuik kami maminta kasadiaan dunsanak kasadonyo untuak maluangkan wakatu maringankan langkah datang ka rumah kami di Piliang Tapi-Kotogadang untuak:
Bakampuangan Gadang Hari Jumat, 6 Juli 2007/ 20 Jumadil Akhir 1428 H
Alek Nagari Hari Ahad, 8 Juli 2007/ 22 Jumadil Akhir 1428 H Jo Ridho Allah SWT di hari nanlah tatakuak nantun, kami nak maanjuang tinggi maamba gadang pusako kaum kami:
DATUAK BAGINDO KALI Manuruik adat nan diisi, limbago nan dituang kapado dunsanak kami: Dr. H. Nizammuddin MS St. Bagindo Kali Untuak mamakai baju kabasaran Panghulu Suku Guci/Piliang, dan sabagai Panungkeknyo: H. Kemal Amin SE AK MM St. Mahyudin Angku-angku jo rangkayo sarato sanak famili jo handai taulan, sangat kami harokkan dapek mamanuahi undangan kami nangko. Mudah-mudahan Allah SWT mambari barokah, hidayah dan Inayah Nya kapado kito sadonyo. Tairiang salam tazim kami, SILANG NAN BAPANGKA KARAJO NAN BAPOKOK Wassalamualaikum Warahmatullahi Wabarakatuh DATUAK SAPASUKUAN GUCI/PILIANG dan Kaum anak kemenakan DATUAK BAGINDO KALI
 
Berita Kaba Kampuang Lainnya

Video Pilihan


Nagari Koto Gadang, Kecamatan IV Koto, Kabupaten Agam, ...

RUMAH-RUMAH NAN INDAH DI KOTO GADANG